NJË JAVË “PUSHIM” NGA RRJETET SOCIALE, E MIRA PËR SHËNDETIN MENTAL

NJË JAVË “PUSHIM” NGA RRJETET SOCIALE, E MIRA PËR SHËNDETIN MENTAL

sipas një studimi të ri shkencor britanik, personat që “pushojnë” nga përdorimi i rrjeteve sociale qoftë edhe për një javë tregojnë përmirësim të dukshëm në gjendjen shpirtërore dhe shëndetin mendor. Studiuesit në Universitetin Bath, të udhëhequr nga Dr. Jeff Lambert i Departamentit të Shëndetësisë, hulumtuan 154 njerëz të moshës 18 deri në 72 vjeç, të cilët ishin përdorues të përditshëm të rrjeteve sociale. Pjesëmarrësit u ndanë rastësisht në dy grupe: Njëri grup vazhdoi të përdorte mediat sociale (Facebook, Instagram, Twitter, TikTok) në baza ditore, ndërsa tjetri ndaloi për një javë. Shëndeti mendor i individëve u analizua si në fillim ashtu edhe në fund të studimit.

Një javë “mungesë” nga mediat sociale u zbulua se ishte e mjaftueshme për të përmirësuar ndjenjën e përgjithshme të mirëqenies mendore dhe për të reduktuar simptomat e ankthit dhe depresionit në veçanti.

Lambert theksoi se “përdorimi i mediave sociale është aq i përhapur sa shumë prej nesh e bëjnë atë pa menduar, që nga momenti kur zgjohemi deri kur flemë. Ne e dimë se për shkak të këtij përdorimi të madh të mediave sociale, janë shprehur shqetësime në rritje për efektet në shëndetin mendor. Studimi ynë tregoi se shumë pjesëmarrës raportuan përfitime nga një pushim javor nga mediat sociale, duke treguar humor të përmirësuar dhe më pak stres në përgjithësi, që do të thotë se edhe një pushim i shkurtër mund të ketë një efekt pozitiv”.

“Por nëse shpenzoni orë të tëra çdo javë në to dhe ndiheni të ndikuar negativisht, vërtetë duhet të ndaloni përdorimin e tyre për të parë nëse do të ndihmojë”, tha ai.