MUNGESA E GJUMIT OSE FJETJA E TEPËRT DËMTON SHËNDETIN
Një studim mbi gjumin ku morën pjesë mbi 1 milion njerëz të rritur sugjeron se shëndeti i mirë i zemrës kërkon 6 deri në 8 orë gjumë. Studiuesit analizuan të dhënat e individëve që flinin 6-8 orë gjumë me të tjerët. Gjetjet treguan se individët që flenë më pak se 6 orë gjumë janë 11 për qind më të rrezikuar nga vdekja e parakohshme prej sëmundjeve të zemrës ose ishemisë. Nga studimi rezultoi se njerëzit që flenë më shumë se 8 orë janë 33 për qind më të rrezikuar.
Të dhënat e këtij studimi u prezantuan në takimin e Shoqatës Evropiane të Kardiologjisë që u mbajt në Munih të Gjermanisë. Ekspertët pranuan se gjumi ndikon në shumë procese biologjike siç është metabolizimi i glukozës, tensioni i gjakut dhe inflamacioni. Të gjitha këto procese nga ana tjetër ndikojnë tek sëmundjet kardiovaskulare. Sipas tyre, njerëzit duhet të shmangin mungesat afatgjata të gjumit ose fjetjen e tepërt në të mirë të shëndetit të tyre. Drita natyrale gjatë ditës e mban ritmin biologjik të trupit në nivele të shëndetshme por edhe siguron që cilësia dhe kohëzgjatja e gjumit do të jetë në nivele optimale. Përpiquni të jeni sa më në kontakt me dritën natyrale gjatë ditës.
Ekspozimi ndaj dritës artificiale me ngjyrë blu është i keq për trurin. Ky ndriçim e mashtron trurin dhe e bën të mendojë se është akoma ditë dhe pengon prodhimin e melatoninës, hormonit të gjumit. Përpiquni të mos shikoni televizor, tablet apo celular të paktën 2 orë përpara se të bini për të fjetur. Sugjerohet që të mos pini kafe pasdite vonë dhe të mos flini gjatë ditës, nëse keni vështirësi për të fjetur në darkë. Ritmi biologjik i trupit ka nevojë për rregull dhe përpikëri.
Kur flini dhe zgjoheni në një orar të caktuar keni një gjumë më cilësor. Melatonina është një hormon kyç për gjumin cilësor. Suplementët e melatoninës që blihen në farmaci duhet marrë 30-60 minuta përpara se të bini për të fjetur. Pirja e alkoolit ka një ndikim negativ tek gjumi dhe hormonet. Alkooli përkeqëson simptomat e gërhitjes dhe pagjumësisë. Dhoma e gjumit duhet të jetë në errësirë, e pastër dhe e ajrosur mirë. Temperatura e ajrit në dhomë duhet të jetë rreth 20 gradë Celsius. Ekspertët thonë që ushqimet me karbohidrate duhen konsumuar disa orë dhe jo disa minuta para gjumit.
Leave a Reply