Një ngjarje tronditëse ndodhi mbrëmë gjatë natës në Spitalin “Nëna Terezë” në Çair. Vdes shtatzëna 26 vjeçare ndërsa me ndërhyrje cesariane i është nxjerrë foshnja, njoftojnë me keqardhje të thellë nga Ministria e Shëndetësisë. Pacientja ka pasur lindjen e parë, ka qenë në muajin e 36-të të shtatzënisë, në spital është sjellë në situatë të rënduar shëndetësore, me shtypje të lartë të gjakut dhe me frymëmarrje të vështirësuar – thuhet në komunikatën e MSH-së.
“Nga kontrolli i raporteve në sistemin elektronik të të dhënave “Termini im”, rezultoi se bëhej fjalë për një shtatzëni me kontrolle të pamjaftueshme, me vetëm një kontroll të mëparshëm në 30 javë të shtatzënisë, kur edhe është konstatuar për herë të parë prania e tensionit të lartë në gjak. Pacientit më pas i është dhënë terapi dhe udhëzime për monitorim intensiv dhe kontrolle spitalore. Sipas familjarëve, pacientja nuk ka shkuar për kontrolle, dhe ka marrë terapi herë pas here”, thuhet mes tjerash në njoftimin e Ministrisë së Shëndetësisë.
Në njoftim thuhet se pacientja ka ndërruar jetë mbrëmjen e djeshme, ndërkaq me sukses i është nxjerrë një foshnje të gjinisë mashkullore, që më pas është transferuar në Klinikën për Fëmijë në Shkup.
“Ka lindur foshnje mashkull, i cili pas stabilizimit fillestar është transferuar në Klinikën e Pediatrisë. Fatkeqësisht, pavarësisht masave gjithëpërfshirëse për reanimim, pacientja i është nënshtrua dekompensimit të përgjithshëm kardiopulmonar dhe ka ndërruar jetë në orën 22:10”, theksojnë nga Ministria e Shëndetësisë.
Leave a Reply